کئفلی ایسکندر

اولکه ده ایکی بویوک گروپا تقدیم اولونور

سییاست نه دئمکدیر؟!

عابباس ائلچین شاه دوورونوندن قالان سییاستمدارلارداندی، یوخاری تحصیلی اولماقدا، اینگیلیس سلطنتی یونیوئرسیتی لرینده، فرانسا -پاریس سییاست اورگه دن دانیشگاهلاریندا، عومور سوروب ،سوموگ سیندیریب. شاه دورونون بوتون وزارتخانالاریندا- کابینه لرده اولوب، بویوک مقاملارا یئتیشیب. حتتا اینقیلابدان سونرا ،موققت اینقیلابی کابینه ده واریدی ،آمما آدی دئییلمیردی!اونون سوزلرین هممشه، وزیرلر- وکیللر ائشیدیب ،ایشه گوتوروردیلر. داها ایندی ائشیگه چیخمیر، ائشیگه چیخماقی ،باغی اوزو اکن گیلاس دیبینده اوستولون اوستودی کی اورادا گتیریب، آپاریرلار. عابباس ائلچینین آخیر موصاحبه سی ائلچی بئی ایله سیزین نظریزدن گئچیردیرم.

ائلچی بئی: سلام عابباس ائلچین جنابلاری واقت نیزی آلماقدا ،سیزدن، سیزین عائله یزدن ،عذر دیله ییرم.

عابباس ائلچین: بونلار نه سوزدی، اوقدر سیز مطبوعاتچیلار، منیم یانیمدا حومتیز وارکی عابباس میزا بابامین ناهاریندا قوناق اولسایدیم ،دوروم گلردیم سیزین یانیزا!

ائلچی بئی: سیزین لوطفوز وار، سیزی چوخ یورمییه جه یم، ایسته ییرم بیلم بو قدر یاشامیسیز، بو قدر خاریجی اولکه لرده اولموسوز، بو قدر کابینه لرده بویوک سییاستمدارلاریلا دوشموسوز، بو سییاست کلمه سی نه معنی وئریر؟ ساده صورتده بیزیم اوخوجولاریمیزا توضیح وئره سیز .

عابباس ائلچین زورلا -بالاییله دوردی آیاغا ،اؤز چلیگیله بیر اورتا عووضا اوخشامیش دایره یئرده چکدی، سونرا یانینداکی ولی یه  اوز توتوب، دئدی: ممکن اولسا او لاری خوروزی (دارتانی) گتیر بورا. بیر- ایکی دیقه دن سونرا ولی دارتانی  گتیردی، عابباس ائلچینین ایزنیله او جیززیغین اورتاسینا  آتدی، سونرا عابباس ائلچین اوز توتوب ائلچی بئی یه، دئدی:ائلچی بئی، گئچ، جیززیغین ایچه ریسینه خوروزی توت ،آمما خوروز گره ک جیززیغدان ائشیگه چیخمییا ها!

ائلچی بئی :عابباس ائلچین جنابلاری بونون سییاسته نه ربطی وار؟

عابباس ائلچین:ربطی وارکی دئییرمدا.

ائلچی بئی دفتر- قلمی یئره قویوب، دوردی آیاغا نقدر ائیله دی خوروزی توتانمادی هئچ، جیززیقدان دا نقدر او طرفه باغین بوجاغیندا ،ائلچی بئی خوروزی آختاریردی! ولی اونون دادینا چاتیب دارتانی  توتوب گتیریب، جیززیغا اوتوردولر.

عابباس ائلچین اوز توتوب ائلچی بئی یه ،دئدی:ایندی باخ منه ،یئنه دن ولی یه، دئدی: قاچ اوبیرسی خوروزی ییرتانی گتیر.ولی بیر آزدان سونرا خوروزی گتیریب،  عابباس ائلچینین ایزنیله اوولکی خوروزون یانینا اوتوردی.

 دارتانیله ایله  ییرتان  بیر- بیرین  گورن آن، بیر- بیرینین باشینا آتیشدیلار.

 بیر- ایکی دیقه دن سونرا او شیرین دویوشمه ده، عابباس ائلچین یاخینلاشیب، ایکی سینین بوغازین ،هم دارتانین همده ییرتانین بوغازیندان توتوب، ائلچی بئی یه باخیب، گوله –گوله ،دئدی: سییاست یعنی بو! سیز جیززیغین آراسیندا بیرین توتانمادیز! من قوجا، جیززیغین اورتاسیندا ایکی سین توتدوم!!

گرگرلی آراز