گوللو چادیرا

عزیر عمی جوما آخشامی مال بازاریندا دولانیردی،

گلمیشدی بیر سوتلو اینک آلسین، هردن بیر الین جیبینه

چکیردی، گؤرسون پوللار یئرینده، یا یوخ! بیر آز

دولاناندان سونرا گؤزل بیر اینک کی قونشو کتدن

گتیرمیشدیلر، آلدی. تئز گتیریب تؤیله یه باغلادی،

عاییله ده هامیسی بیر-بیر گلیب، باخیب، به یندیلر.

همیشه تؤیله نین ایشین عزیز عمی اؤزو گؤرردی.

بایدانی گؤتوروب، تؤیله یه گئتدی؛هم اینه ی ساغسین،

همده اونون آلتین- اوستون تمیزله ییب، سهمانا سالسین.

آما نه قدر چالیشدی، اینه یی ساغا بیلمه دی!

او گوندن ایکی گون سوووشدو، آز قالیردی اینه یین

امجکلری سوتدن پارتلاسین. عزیز عمی گئتمیشدی

اینه یین ایلک یییه سین گؤرسون، یا اونو قایتارسین،

یادا چاراسین اؤیرنسین.

هامی آیاق اوسته نییاران؛ عزیز عمی گلدی. تئز توکذ

خالایا دئدی: توکذ! قاچ بیر چادیرا گتیر! توکذ دئدی:

کیشی چادیرانی نئله ییرسن؟ عزیز عمی دیله گلدی:

سنین نه ایشین؟ قاچ گتیر! بیر گوللو- گوللوسون گتیر.

بیر آزدان سونرا عزیز عمی گوللو چادیرانی اؤرتموشدو!

اینه یین آلتیندا اونو هم ساغیردی! همده راحاتلاییردی.

اینکده هردن دؤنوب عزیز عمی یه باخیب، راضیلیغین

بیلیندیریردی. اوراسین دئییم، بو اینه یی یالنیز بیر قادین

ساغمیشدی! اینک اؤزون اونا عادت وئرمیشدی! آیری بیر

آدامی، حتتا عزیز عمی اولموش اولسایدیدا، ساغماغا قویمازدی!

هر ایش بئله دی، او گونلری رجب علی ایسته ییرمیش

بانکلارین بیریندن وام آلسین. شراییطی توتمورموش،

هاردان ائشیتمیشدی اوردا ایشله ین کارمند یئیه ندی!

آداملارین ایچینده آپاریب بیر قوتو اریک، بیر بود ات

اونون میزینین اوستونه قویموشدو؛ رجب علی نین وامین

یولا سالسین؛ او قبول ائتمه میشدی! ایش ساواشا چکمیشدی!

رجب علی نی ووروب ، ائشییه سالمیشدیلار!

رجب علی گلیب منه دئدی؛ منده اونا دئدیم: رجب علی! سن

ایشتیباه ائتمیسن، عزیز عمینین اینه یین اونا میثال گتیردیم،

گرک بو روشوه نین اوستونه بیر چادیرا اؤرته یدین، یادا

چادیرا تکین بیر کیلید تاپایدین. من بیله سی او کارمندین

کیلیدی هزی معللیمدی، اونو گؤتور؛ اریک، اوزوم یوخ

ها! بیر آز پول قوی چادیرانین آلتینا، چادیرا یوخ ها!

پاکئتین آراسینا؛ هزی معللیم اؤزو بیلر نئیله سین! هم سنی

اونلا باریشدیرار، همده سنین وامین دوزه لر.

بیر ایکی آیدان سونرا رجب علی نی گؤردوم، سوروشدوم

نئجه اولدو؟ گوله - گوله دئدی: هر واخت وام لازیم اولاندا

او گوللو چادیرانی اؤرتوب، اینه یی ساغیرام! نه تپیک

آتیر! نه دیلله نیر! هردن دؤنوب منه باخیر، هله آز قالیر

ساغیلا- ساغیلا بیر گولسونده!

گرگرلی آراز